KWANDIKA IBITABO MU KINYARWANDA

Kwandika ni umuco wazanywe n’abazungu mu kinyejana cya makumyabiri. Kwandika ariko bimaze kuba umuco uhamye mu Rwanda n’ubwo bitaragera ku rwego rwo kubigira umwuga utunze abantu benshi.

Kwandika mu Kinyarwanda bihesha agaciro kandi bigateza imbere uru rurimi. Inkuru, amakuru, ubushakashatsi, ubumenyi bwavumbuwe, amateka,… byose ni inyandiko zishobora kujya mu Kinyarwanda.

Dore urugero rw’igitabo kivuga ku myemerere y’abantu cyahinduwe mu Kinyarwanda, kivuye mu nyigo za Filosofiya naTewolojiya zivuga ku myemerere ya muntu muri rusange no ku bukrisitu by’umwihariko. Icyo gitabo vcyanditswe na Padiri Luigi Giussani wo mu Butaliyani kandi kirimo ibyiciro nyamukuru bitatu ndetse twakita “Inyabutatu” ya Giussani.

Iki gitabo rero kigizwe n’ibitabo bitatu (trilogy) nta kindi kigamije uretse kwemeza ukuri. Intego yacyo ni Ukugaragaza uko ikibazo cy’Ubukristu cyavutse, ndetse no mu mateka. N’ubwo uko ibice by’iki gitabo bikurikirana bitavuga ko bikemura ibibazo byose mu buryo busesuye, bigaragaza inzira igomba gukurikizwa: gukoresha ubwenge n’inyurabwenge (reasonableness). Imana, mu by’ukuri, yihishura mu gihe no mu mwanya (time and space), igasubiza ku cyifuzo nyakuri cy’umuntu.

Muri iki gihe, akenshi havugwa ko ubwenge (reason) nta sano bufite n’ukwemera (faith). Ariko se ukwemera ni iki? Ubwenge bwo ni iki?

Imyumvire y’iki gihe igabanya uruhare rw’ubwenge irugarukiriza ku kuba icyiciro cy’amatsinda y’ibitekerezo aho ukuri kugomba kwinjizwa ku ngufu, kandi ikintu cyose kidahuye n’ayo matsinda kigafatwa nk’ikidafite ishingiro ryumvikana (irrational). Nyamara ubwenge ni nk’ijisho ryitegereza ukuri, rikakwakira rishishikaye, rikamenya amasano n’ingaruka zayo, rikinjira mu ndiba y’ukuri, rikava ku kintu kimwe rikajya ku kindi ariko rikabibika byose mu bwenge, rigerageza gusobanukirwa n’ibintu byose muri rusange. Umuntu ahura n’ukuri akoresheje ubwenge. Ubwenge ni bwo butugira abantu. Ku bw’iyo mpamvu, tugomba kugira ishyaka ryo gukurikiza ubwenge n’ubumvikane, kandi iri shyaka ni ryo mugozi uzaduyobora muri iki kiganiro. Ni yo mpamvu igitabo cya mbere cy’iyi trilogy, The Religious Sense (Icyumviro cy’Iyobokamana), gitangira n’amahame atatu y’uburyo bwo kwiga (methodological premises), agamije kudufasha gusobanukirwa uko umutimanama w’umuntu, ku bwawo karemano, ukora ugatekereza..